„Sinnuleysi æðstu stjórnenda…þeir leyfa þessu að gerast” Upplifun þolenda og utanaðkomandi ráðgjafa á úrlausn eineltis á vinnustað

Vinnustaðir verða alltaf flóknari og flóknari vegna hraðrar tækniþróunar sem leiðir til aukinnar streitu og samkeppni á vinnustöðum. Ný könnun sýnir að rúmlega tveir af hverjum tíu hafa orðið fyrir einelti á vinnustað á vinnuferli sínum hérlendis. Rannsóknir hafa sýnt fram á að afleiðingar eineltis geta verið mjög alvarlegar. Tilgangur rannsóknarinnar: „Sinnuleysi æðstu stjórnenda…þeir leyfa þessu að gerast” var að skoða upplifun utanaðkomandi ráðgjafa og þolenda eineltis á úrlausn eineltismála á vinnustöðum. Tólf viðtöl voru tekin, þar af sex við utanaðkomandi ráðgjafa og sex við þolendur í eineltismálum. Eigindleg aðferðafræði var notuð við framkvæmd rannsóknarinnar og greiningin byggði á fyrirbæralegri aðferðafræði. Þemun sem komu fram við fyrirbærafræðilega greiningu reyndust vera fimm. Þau voru: Lúmskar birtingarmyndir, alvarlegar afleiðingar af einelti, slæm stjórnun, ótrúlega þungt ferli að fara í gegnum og svolítið eitruð vinnustaðamenning. Niðurstöður þessarar rannsóknar benda til að upplifun ráðgjafa sé að eineltisferlið sé mjög þungbært og samkvæmt þeirra reynslu borgar það sig fyrir fyrirtæki að grípa strax inn í þegar árekstrar verða en ekki sitja og bíða eftir að starfsmenn finni lausnir sjálfir. Þannig gæti ágreiningur stigmagnast og aðstæður myndast þar sem einelti nær að þróast. Þeir þolendur sem störfuðu hjá fyrirtækjum sem fengu aðstoð utanaðkomandi ráðgjafa í kjölfar kvörtunar um einelti voru ánægðir með ráðgjafaþjónustuna sjálfa en óánægðir með hæfni eða vilja stjórnenda til að hlusta á og vinna með þau ráð sem þeir fengu. Lykilorð: Einelti á vinnustað, forysta og stjórnandinn, utanaðkomandi ráðgjafar,vinnustaðamenning, streita